UTS ta introdusí pakete úniko ‘UTS Double Play’

Willemstad 18 yüli 2010 - UTS, awor ku pakete úniko ‘UTS Double Play’, introdusiendo e spit di internèt di mas haltu na Kòrsou, 10 megabit den kombinashon ku yamadanan ilimitá 24 ora pa dia i 7 dia pa siman.

UTS Double Play ta konsistí di ADSL internèt 10 Mbps plùs yamadanan ilimitá di un telefòn di kas pa un otro telefòn di kas durante henter dia, shete dia pa siman i tur esaki pa solamente ANG. 179,- pa luna. E oferta ku preis speshal aki ta solamente pa klientenan di UTS OneNet (residenshal) i e yamadanan ilimitá ta konta pa telefòn di kas postpago i prepago. Tene kuenta si ku den e preis aki no ta inkluí e abono mensual di ANG. 25,- pa liña fiho i klientenan di telefòn di kas prepago mester tin un suma di ANG 0,01 riba nan kuenta pa por hasi uzo di e yamadanan ilimitá.

E oferta aki ta bálido di 19 di yüli te ku 23 di yüli 2010 i por apliká solamente via www.uts.an ku un kontrato di 2 aña. Pa apliká ta masha fásil. Subi www.uts.an, chèk si 10 Mbps ta optenibel na bo kas kaba, yena, print i firma e kontrato ku ta wòrdu generá i entrega esaki huntu ku un kopia di bo identifikashon bálido na un di nos UTS Storenan. Despues di a risibí esaki e aplikashon ta ser prosesá.

Pues awor, UTS, e úniko provedó di internèt aki na Kòrsou, ofresiendo e spit altisimo aki di konekshon di internèt na klientenan di UTS OneNet kombiná ku yamadanan ilimitá 24 ora pa dia, 7 dia pa siman. Ku e spit haltu aki usuarionan por sùrf i komuniká hopi mas efisiente i efektivo riba internèt i alabes papia bai gol na nan telefòn di kas.

Tur esaki ta posibel dor di e proyekto ‘Fiber to the Curb’. Esaki ta enserá ku UTS ta tresiendo e kabelnan di faiber óptiko mas serka di e klientenan su kas. Dor di amplia e kapasidat di ADSL, den futuro UTS por duna diferente tipo di servisio manera bos, video, televishon di kabel, data i internèt riba un solo konekshon.

UTS ta sigui perkurá pa un kalidat di komunikashon den tur sentido di palabra konfiabel, pagabel i un kobertura amplio i lo keda hasi lo máksimo pa aportá na mehorá e kalidat di komunikashon entre hende ku su servisio i produktonan.

Probechá awor, paso e preis redusí di e tremendo pakete aki ta bálido e siman aki so so! Despues di e siman aki, klientenan di UTS OneNet i tur hende ku no ta kliente ainda, por apliká pa e pakete aki pagando e preis normal di ANG. 225,- pa luna.

Pa mas informashon bishitá www.uts.an òf yama 9221.