UTS BUSINESS ku tremendo kongreso 10 di desèmber próksimo

Dia 10 di Desèmber próksimo, UTS Business ta organisá un kongreso grandi di alto nivel na Renaissance Hotel ku lo hiba e título “Unified Communications”. E kongreso aki ta kompletamente grátis. “Unified communications” ta e integrashon di komunikashon di “real-time” huntu ku “non-real time”. Integrashon ta riba área di “instant messaging” (chatmentu), “IP telephony”, “video conferencing”, kòntròl riba yamada, rekonosementu di bos, SMS, faks, Voicemail i E-mail. Kemen esaki ta un kombinashon di diferente servisio pa fasilitá komunikashon den un kompania dor di diferente medio i ekipo.

Na e kongreso aki lo bai tin presentashonnan di e distribuidornan mundialmente renombrá riba tereno di Telekomunikashon. E partisipantenan na e kongreso ta RIM, ANIXTER, POLYCOM, CISCO, DELL Netherlands i UTS.

E kompania RIM ku ta pará pa Research In Motion, kende ta e inventornan di e famoso marka BlackBerry lo tei presente ku un surtido di tur nan solushonnan riba tereno mobil.

Representantenan di e kompania Anixter i Polycom te tei pa splika i demostrá kon pa medio di nan ekiponan un kompania por hasi uso efektivamente di Unified Communications. Anixter un di ta distribuidor di sentralnan di telefon i ekiponan di marka Nortel i Avaya.

Nan presentashon lo enserá tambe un demostrashon di konferensha via video kaminda e direktor general di e departamentu di Salubridat di DELL na Hulanda, lo trese un diskurso. E tópiko ku e lo elaborá ariba lo ta basá riba kon un kompania por hiba un maneho responsabel den teknología (IT) teniendo na kuenta nos medio ambiente.

Otro di esnan internashonalmente renombrá riba tereno di “Unified Communications” ta e kompania Cisco. Cisco su representantenan lo presentá un modelo yamá “Unified Collaboration”, demostrando kompanianan kon nan por saka mas benefisio for di nan ekiponan di telekomunikashon.

Sr. Paul de Geus, direktor general di UTS tambe lo hasi un presentashon interesante kaminda e lo splika kiko UTS Business ta hasiendo riba e tereno aki. UTS lo demostrá ku e tambe ta sigui e teknologia moderno di “Unified Communications” ku e meta pa brinda su klientenan e fasilidatnan ku mundialmente a bin ta desaroyando.

Mèrdia lo bai tin un lùnch sukulento. Durante di esaki e presentadó internashonal, Vincent Everts, kende ta un di e presentadónan mas pidí na Oropa, lo entretené e públiko ku un diskurso tremendo titulá “Innovashon durante krísis, inspirá dor di e konsumidó”. Pa mas informashon di Sr. Everts por bishitá e website http://www.vincente.nl/. Pa por asistí na e lùnch tin karchi disponibel na rason di Ang 75,- si reservá promé ku 4 di desèmber. Despues karchinan lo ta na rason di Ang 100,- pa persona.

Pa mas informashon i registrashon pa e kongreso aki por bishita nos página wèp: www.uts.an/businessevents, email business@uts.an òf por yama na 777-1714.