Tarifa di abono di telefòn fiho i Telefásil lo subi, pero ta inkluí 20 minüt grátis na yamada

Kòrsou, 15 di òktober 2009 – Ku aprobashon di Bureau Telecommunicatie & Post i Minister di Transporte i Telekomunikashon, entrante di 1 di novèmber 2009, e tarifa di abono pa kada konekshon di telefòn di kas postpago ta wòrdu adaptá i ta bira Ang. 25,- pa luna. Esaki ta konta tambe for di 1 di desèmber 2009 pa telefòn di kas prepago, esta Telefásil. Pues e tarifa di abono aki ta bai konta pa kada konekshon di telefòn fiho, tantu postpago komo prepago.

Ya pa mas ku 30 aña e abono pa telefòn fiho a keda meskos na Ang. 18,- pa luna. Maske ku kosto di bida a subi den tur e añanan i preisnan di otro produktonan si a subi, UTS a mantené e montante aki i nunka a introdusí un abono pa Telefásil. Pero realidat ta ku kosto di operashon ta keda subi i mester hasi ahuste den abono i tarifanan.

Abono mensual di telefòn fiho

Aworakí e abono di telefòn di kas postpago ta mensualmente Ang 18,- i lo bira Ang 25,- entrante 1 di novèmber próksimo. Pues un oumento di Ang 7,-. Pa e servisio di Telefásil ku no tabatin abono, for di 1 di desèmber 2009 awor ta introdusí un abono mensual di Ang. 25,-. Klientenan por sigui hasi yamada ku Telefásil dor di rekargá nan kuenta ku e karchi di Tilin.

Minüt grátis i tarifa redusí

No opstante e oumento di e tarifa di abono, UTS ta keda e kompania ku ta garantisá pueblo servisio i produktonan di telekomunikashon konfiabel, pagabel i kumbiniente. P’esei den e abono di Ang. 25,- UTS ta inkluí 20 minüt di yamada lokal grátis di telefòn fiho pa otro telefòn fiho, kual ta aplikabel pa tantu telefon fiho postpago komo prepago durante henter dia, 7 dia pa siman. Ademas e tarifa pa yamadanan lokal di un telefòn fiho pa otro telefòn fiho ta ser adaptá na Ang 0,16 pa yamada i Ang 0,04 pa minüt durante henter dia, 7 dia pa siman. Tambe e tarifa pa yamadanan pa telefòn selular for di un telefon fiho prepago, a ser redusí te ku Ang 0,50 pa minüt. E tarifanan atraktivo di UTS pa yamadanan internashonal ta keda meskos.

Den kaso ku un kliente di telefon fiho prepago no hasi su pago di abono di Ang. 25,- promé ku 1 di desèmber 2009, lo apliká un ‘lijntoeslag’ di Ang 0,60 pa minüt riba e tarifanan lokal. Ademas lo no ta posibel pa hasi yamadanan internashonal. E alternativa temporal aki ta ser ofresé te ku 28 di febrüari 2010. Si despues di e fecha aki ainda un kliente no paga su abono, lo e no por hasi uso mas di e servisio di telefon fiho prepago.

Yamada grátis i ilimitá

Aparte di e adaptashon di e tarifanan aki riba menshoná, UTS ta brinda e klientenan di telefòn fiho postpago e oportunidat pa yama grátis i ilimitá for di 1 di novèmber 2009 te ku 28 di febrüari 2010 den e orario sosial den siman. Pa klientenan di Telefásil e periodo di yama grátis i ilimitá den orario sosial ta kore di 1 desèmber 2009 te ku 28 febrüari 2010. E orario sosial ta konta solamente pa yamadanan lokal di un telefòn fiho pa otro telefòn fiho, di djaluna pa djabièrnè for di 7’or di anochi te ku 7’or di mainta.

Paketenan di yamada adishonal pa telefon fiho postpago

UTS ta introdusí tambe diferente paketenan adishonal i kumbiniente pa klientenan di telefon fiho postpago pa hasi yamadanan ilimitá den oranan di anochi, wikènt òf un kombinashon di nan dos.

Pakete den oranan di anochi.

E pakete aki ta kosta solamente Ang. 7,50 i klientenan por hasi yamadanan ilimitá ku ta konta solamente pa yamadanan lokal di un telefòn fiho pa otro telefòn fiho, di djaluna pa djabièrnè for di 7’or di anochi te ku 7’or di mainta.

Pakete den wikènt.

E pakete aki ta kosta solamente Ang. 12,50 i klientenan por hasi yamadanan ilimitá ku ta konta solamente pa yamadanan lokal di un telefòn fiho pa otro telefòn fiho, riba djasabra i djadumingu henter dia.

Kombinashon di pakete den oranan di anochi i wikènt.

E pakete aki ta kosta solamente Ang. 17,50 i e ta un kombinashon di pakete di anochi i wikènt. Pues klientenan por hasi yamadanan ilimitá ku ta konta solamente pa yamadanan lokal di un telefòn fiho pa otro telefòn fiho, di djaluna pa djabièrnè for di 7’or di anochi te ku 7’or di mainta i riba djasabra i djadumingu henter dia.

Kampaña di internèt

Dia 16 di òktober 2009 UTS ta introdusí un tremendo kampaña di internèt. Tur kliente ku apliká pa un konekshon di UTS OneNet di kualke spit te ku 30 di novèmber 2009, lo risibí 3 luna di abono di internèt kompletamente grátis for di e momentu ku su ADSL keda konektá. Ademas klientenan ku ‘upgrade’ nan spit eksistente di OneNet te ku 30 di novèmber 2009, lo keda paga e preis di e spit anterior pa tres luna largu. E kampaña aki ta konta solamente pa klientenan ku apliká via di www.uts.an òf serka un di e ‘authorized distributors’ nan di UTS.