UTS ANFITRION DI KONFERENSHA I EKSHIBISHON DI TELEKOMUNIKASHON

Hopi interes pa e di 26 Konferensha Anual di CANTO!

Willemstad 5 yüli 2010 - Durante e periodo di djadumingu 11 te ku djarason 14 di yüli próksimo, Kòrsou lo ta sede di e di 26 Konferensha Anual di e organisashon CANTO (Caribbean Association of National Telecommunications Organizations). E konferensha aki ta tuma lugá den World Trade Center Curaçao i ta ser ouspisiá pa UTS. Tema di e konferensha aki ta: “Embracing Technology for Economic Success”. Un kantidat di mas ku 500 persona vinkulá den mundu di telekomunikashon tantu for di region di Karibe, Merka, Canada i Oropa lo ta presente pa partisipá na e importante konferensha aki. Huntu ku e konferensha lo tin tambe un ekshibishon, den kua diferente kompania lo ekshibí nan ekipo i sistemanan di telekomunikashon. Durante e periodo aki, Kòrsou lo ta showcase di e último desaroyonan riba tereno di teknologia di telekomunikashon.

Tur aña e organisashon CANTO, ku ta e organisashon di kompanianan nashonal di telekomunikashon den Karibe, ta organisá su konferensha anual, durante kua su miembronan ta bini huntu pa diskutí i interkambiá ku otro puntonan di interes mutuo riba asuntunan di telekomunikashon. CANTO tin alrededor di 40 pais ku ta miembro i tur aña ta tene e konferensha aki na un di e paisnan ku ta miembro. E aña aki, CANTO ta organisá su di 26 Konferensha Anual i lo ta di 7 biaha ku Kòrsou tin e honor pa organisá e magno evento aki.

CANTO a ser fundá na aña 1985 na Trinidad & Tobago ku e meta pa establesé un foro pa medio di kua kompanianan di telekomunikashon establesé den Karibe por krea e oportunidat pa trese mas rekonosementu pa asuntunan di telekomunikashon den e region di Karibe, i alabes krea un foro pa interkambio di informashon riba tereno teknológiko, finansiero, atministrativo i di rekursonan humano den telekomunikashon. Ku formashon di e organisashon CANTO, e paisnan den Karibe kier a trese tambe ún polítika di maneho den e sektor di telekomunikashon den Karibe, di moda ku por konsiderá mihó asuntunan komun di e miembronan, ku ta enbolbí den dunamentu di servisio di telekomunikashon den e área di Karibe.

Durante e konferensha di e aña aki, diferente persona importante den asuntu di telekomunikashon lo ta presente pa hiba palabra. Apertura di e konferensha ta tuma lugá riba djadumingu 11 di yüli i lo ta na enkargo di Gezaghèber di Teritorio Insular di Kòrsou, señora mr. Lizanne Dindial, miéntras ku apertura di e ekshibishon di ekiponan di telekomunikashon lo ta den man di Gobernador di Antia Hulandes mr. Frits Goedgedrag. Durante e apertura di e konferensha lo hiba palabra tambe Presidente di Hunta di Komisario di UTS, señor Anthony Godett, Direktor General di UTS, señor ing. Paul de Geus i Presidente di CANTO, señor Dirk Currie di Sürnam, miéntras ku dr. Emsley Tromp, Presidente di Banko Sentral di Antia Hulandes lo hiba un diskurso di òrdu. Ya kaba tin diferente minister for di region di Karibe a konfirmá nan partisipashon na e konferensha aki, miéntras ku mas ku 70 kompania di telekomunikashon a konfirmá nan partisipashon den e ekshibishon di CANTO.

En prinsipio tantu e konferensha komo ekshibishon ta pa miembronan di CANTO, pero riba djamars 13 di yüli, e ekshibishon lo ta habrí pa públiko general, kuminsando for di 9:30 di mainta te ku 12’or di mèrdia . Entrada ta grátis.

“Nos ta hopi orguyoso, ku un biaha mas UTS por ta anfitrion di e konferensha i ekshibishon di CANTO. No únikamente e eskoho di Kòrsou ta bolbe re-afirmá ku Kòrsou ta un lugá ideal pa tene tipo di eventonan manera esaki, pero alabes ta un manera pa yuda desaroyá nos turismo i alabes yuda generá divisa pa nos pais”, señor ing. Paul de Geus, CEO di UTS a informá. “E ta un manera tambe, pa medio di e ekshibishon laga komunidat sera konosí ku e diferente teknologianan di telekomunikashon ku ta eksistí, pero tambe pa indirektamente habri posibilidat komersial riba tereno di telekomunikashon entre nos isla ku otro paisnan den region. Di nos parti nos lo sigui hasi nos esfuerso pa sigui atraé i brinda tipo di aktividatnan manera esaki riba nos dushi isla.”